Acts 16

1PAULUS ari kotilan Derpe o Listra. A kilan tounpadak amen mi wasa o, me ad a Timoteus, nain li en Sus me poson amen, a sam a men Krik. 2Nan i kalok mau sili ren saulan en Listra o Ikonien akan. 3Paulus kotin men, i en waroki on i. I ari uk i o sirkomsais i, pweki Sus oko, me mi wasa o, pwe irail asaer, me sam a men Krik amen. 4A ni arail kotikot sili nan kanim akan, re padaki on irail me ren kapwaiada kusoned oko, me wiauier ren wanporon o saunkoa kan nan Ierusalem. 5Momodisou kan ari kelailada ni poson o re totolar ni ran karos. 6A Nen saraui kotin inapwiedi, me ren der padak duen masan nan Asien, re ap kakan sili Prikien o Kalatien. 7Irail lao pwara don Misien, re son daulul wei on Pitinien, a Nen en Iesus sota kotin mueid on. 8Irail lao daulul lar Misien, ap kodilan Troas. 9A kasansal eu pwara don Paulus ni pon: Ol en Masetonien amen me uda, poekipoeki i indada: Kom koti don Masetonien, sauasa kit! 10A lao udialer kasansal o, kit madan kolan Masetonien, pwe se asaer, me Kaun o kotin molipe kit, en kolan padaki on irail ronamau. 11Kit ari masel wei san Troas o inen won Samotrasien, a manda lel on Neapolis, 12O san wasa o lel Pilipi, kanim lapalap ni apali en Masetonien, me kisan sap en men Rom. Kit ari mimieta nan kanim o ran akai. 13Ni ran en sapat se koiei san kanim o, kolan pon pilap pot, wasa re kin kapakap ia. Kit ari mondi o kawewe on li akai, me kin pokopokon wasa o. 14A li amen ad a Lidia, men saunet en likau waitata, men Tiatira amen, me kin kaudok on Kot. Nan i me roneron kit. A Kaun o kotin ritinada monion i, pwen apapwali meakan, me Paulus masanier. 15I o a penainai lao paptaiselar, ap poeki re at indada: Ma komail kasau ia da, me i posonlar Kaun o, komail pan pedelon on nan im ai o kotikot ia; i ari nidinide kin kit. 16Kadekadeo ni at kolan kapakap lidu amen, me kin wun ani, ap tu on kit, me kin kare on moni toto ren a saumas kan ki a wun ani. 17I me idauen Paulus o kit weriwer indada: Aramas pukat me sapwilim en Kot lapalap ladu ko, me kin padaki on komail duen al en maur. 18A mepukat a wiadar ran toto. A Paulus kupurola kaualap ap kotin saupeila masani on nen o: Ni mar en Iesus Kristus me i indai on uk, keredi san i! I ap keredi san ni auer ota. 19A saumas akan lao diarada, me solar kaporopor en ar men wiaki moni, ap saikidi Paulus o Silas, wai ira Ion don wasan net ron saumas akan. 20O kalua ira wei ren saun kapun kan katitiki: Aramas pukat kisan men Sus kin kaokaoe atail kanim, 21O padapadaki tiak me sota pun se en ale de wiada, pwe Kit nil men Rom. 22Aramas karos ap uda por on ira, o saunkapun ko dere san ara likau kan o kapi, ren woki ira. 23Irail wokiwoki ira pan pak toto, rap kase ira di nan imaten o kapiedi silepa o, en kateneten ira di. 24A lao aleer kusoned wet ap kase ira di on nan waron, en imaten o saliedi aluwilu ’ra nin tuka kai. 25A lao ni ailep en pon Paulus o Silas kapakap o melkaka mi Kot, o me salidi ko roneron Ira, 26A sap o madan rerereda, kasukasuk en imaten mokidedar, wanim ko ap madan ritida o ar sal akan karos lapwadar. 27A silepan imaten lao pirida san a mair o kilan wanim ko ar ritidar, ap napekida a kodlas o, a pan kamela pein i, pwe a kiki on, me salidi ko me pitila. 28A Paulus kapitie laudeda masani: Kom der kame uk ala, pwe kit karos mia. 29A ap idok lamp eu o tan rerer o dairukedi san Paulus n Silas. 30O wa ira wei san indada: Main ko, da me i en wiada, pwen kamaurla? 31Ira ap masani: Poson Kaun Iesus, a koe o toun im om pan maurola. 32Ira ari kawewe on i o toun im a karos masan en Kaun o. 33I ari uk ira ni auer ota 11 i pon o, widen ara pwal oko. I o na kan karos ap madan paptais elar. 34I ap kalua won ira nan im a, ap kida mo ’ra kisin mana, o peren kidar a posonla Kot, i o ian a kan. 35A lao ran pasan, saupeidi ko poronela papa ko indada: Lapwada aramas pukat! 36Silepan imaten o ap kaireki Paulus masan pukat indada: Saupeidi ko me ilakido, koma en lapwada. Koma ari kotila popol. 37A Paulus kotin masani on irail: Irail sansal kadeike kit adar o woki kit men Rom, ap kase kit ale nan imaten, a met re men kadar kit ala so sansal. A so, irail en pein kodo, wa kit wei. 38A papa ko kaireki saupeidi kan masan pukat. Irail ap masakadar ni ar ronadar, me ira men Rom. 39Irail ari kodo, poeki re ’ra o wa ira la san, o nidinideki ira, en sapal wei san nan kanim o. 40Ira ari pedoido san nan imaten o, ap kotila ren Lidia. Ira lao tu on saulan kan, ap panaui irail o sipale wei.